- Azken eguneratzea: 2007/07/18
Portada erromanikoa eta gotikoa
Egungo Pasai San Pedroko kanposantuan udalerriaren ondare-hondar historiko zaharrenak kontserbatzen dira. Jatorrizko eliza izan zenaren kanpoko itxituren hormak ikus daitezke bertan. Donostiako artzapez-barrutiaren mende zegoen eta 1450-1460 bitartean egin zen. XVIII. mendearen lehenengo erdian suntsitu zuten.
Muino txiki batean dago eta egun portada erromanikoa soilik kontserbatzen da. Hormatuta dago eta lau arkiboltak osatzen dute. Arkuak zutabe-sortetatik ateratzen dira eta inpostak kapitel-itxura du.
Portada gotikoa ere badu, kanposantura sartzeko. Arku zorrotzaren sarbideak hiru arkibolta ditu. Barruko bi arkuetako giltzarrietan erliebean egindako xehetasunak zeuden eta bat desagertu egin da. Portada hareharri-silarrizko horman sartuta dago eta irregular samarra da.
Barruan azpimarratzekoa da Joaquin Ferrer astronomo eta geografoaren omenez egindako kapera. Bere ondorengoek egin zuten 1865ean.
